श्रीरंग

एक तुझा निळा आसमंतात पसरलेला
एक तुझा निळा गर्द मेघांत मिसळलेला
एक तुझा निळा थरथर आतुर पिसारलेला
एक तुझा निळा रानावनात तुषारलेला
एक तुझा निळा वेल्हाळ यमुनेच्या लाटांचा
एक तुझा निळा चंद्रभागेच्या शांत काठांचा
एक तुझा निळा राधेच्या अल्लड डोळ्यांचा
एक तुझा निळा मीरेच्या पावन ओठांचा
एक तुझा निळा रखुमेच्या युगानुयुग होऱ्यांचा
एक तुझा निळा भामेच्या ताठर तोऱ्याचा
एक तुझा निळा गाभाऱ्यात उगवलेला
एक तुझा निळा अंतरंगात उमटलेला
एक तुझा निळा अगम्य, अरुप दिसणारा
एक तुझा निळा सर्वांगात भिनणारा
एक तुझा निळा माझ्यातून उसवलेला
एक तुझा निळा कधीचा खोल रुजवलेला